Professional boksning yarim o‘rta (-66,68 kg) vazn toifasida ringga ko‘tarilayotgan Qudratillo Abduqahhorov (15-0-0, 9KO) Amerikaning mashhur Top Rank promouterlik kompaniyasi bilan shartnoma imzoladi, deya xabar bermoqda Go Sport.
Ma’lum bo‘lishicha, Abduqahhorov kompaniya bilan 2019 yilda uchta jang o‘tkazish bo‘yicha kelishuvga erishgan. Janglarning eng kamida bittasi chempionlik kamari uchun kechishi lozim bo‘ladi.
Yangi hamkorlikning birinchi samarasi sifatida Abduqahhorov 30 mart kuni AQSHda yaponiyalik Keyta Obaraga (20-3-1, 18KO) qarshi ringga ko‘tariladigan bo‘ldi. Oldinroq mazkur jang 5 yanvar kuni Malayziyada bo‘lib o‘tishi lozim edi. Ammo promouterlarning kelisha olmagani sabab jang qoldirilgandi. Top Rank jangni tashkil qilib beradigan bo‘ldi.
Abduqahhorov va Obara o‘rtasidagi jang yarim g‘olibi IBF chempionlik kamari uchun birinchi raqamli da’vogarga aylanadi.
Eslatib o‘tamiz, ayni vaqtda Abduqahhorov IBF reytingida 4-o‘rinda bormoqda. Obara esa 6-o‘rinda qayd qilingan.
Top Rank promouterlik kompaniyasi dunyoning eng mashhur kompaniyalardan biri sanaladi. Kompaniya dunyoning bir qator yetakchi bokschilari Vasiliy Lomachenko, Terens Krouford, Aleksandr Usik, bundan tashqari o‘zbekistonlik boshqa bir bokschi Fazliddin G‘oibnazarov bilan ham shartnoma imzolagan.
