Qidiruv ishlarini olib borayotgan insonlar «Kardiff» hujumchisi Emiliano Sala va uchuvchi Devid Aybbotson uchgan samolyotning qoldiqlarini topishdi. Bu haqda qidiruvda ishtirok etayotganlardan biri — Devid Merns Tvitter orqali xabar tarqatdi.

Uning yozganlarini Buyuk Britaniya aviasiya hodisalarini tergov qilish bo‘limi retvit qildi. Bugun bu borada rasmiy bayonot berilishi kutilmoqda. Futbolchi va pilotning tanasi topildimi yoki yo‘qmi, bu haqida ma’lumot berilmadi.

Ma’lumotlarga qaraganda, samolyot qoldiqlari La-Mansh bo‘g‘ozi tubidan topilgan.

Ma’lumot uchun. Yanvar oyida «Kardiff» klubi «Nant»dan Emiliano Salani sotib oldi. Futbolchi jamoadoshlari bilan xayrlashish uchun Fransiyaga qaytib, 21 yanvar kuni Uelsga yo‘l olayotganida xususiy samolyot aviaradardan yo‘qolib qoldi. 3 kun davomida qidiruv olib borayotgan polisiya, 24 yanvar kuni qidiruv ishlarini to‘xtatgandi.

Ijtimoiy tarmoqlarda futbolchini qidiruv olib borishni davom ettirish uchun pul yig‘ila boshlandi.