Angliya Premyer-ligasining 27-turidagi «Bernli»–«Tottenhem» uchrashuvi vaqtida maydon chetidagi elektron shitlar orqali O‘zbekistonga sayohat qilishga undovchi reklama e’loni namoyish qilindi.

Reklama matnida «Life is too short not to visit Uzbekistan» deyilgan bo‘lib, jumla «Hayot juda qisqa, O‘zbekistonga kelishga ulgurib qoling» ma’nosini anglatadi. E’londa, shuningdek, 64 davlat fuqarolari uchun O‘zbekistonga kirish vizasi talab etilmasligi targ‘ib qilindi.

Turizmni rivojlantirish davlat qo‘mitasidan Kun.uz’ga ma’lum qilishlaricha, qo‘mita vakillari APLning ikkita o‘yinida LED-ekranlarda O‘zbekiston haqida reklama namoyish qilish uchun «Lagardere sport» kompaniyasi bilan muzokaralar o‘tkazishgan. Natijada 23 fevral kungi «Bernli»-«Tottenhem» (2:1) va «Lester»-«Kristal Pelas» o‘yinlari vaqtidagi reklama kampaniyasi bo‘yicha kelishuvga erishilgan. Lester shahridagi o‘yin Toshkent vaqti bilan soat 22:30da boshlandi.

«Ikki oy avval Angliya Premyer-ligasi vakillari bilan to‘g‘ridan-to‘g‘ri aloqaga chiqdim, ular bilan muzokaralar olib borib, liganing ikkita o‘yinida  bepul reklama bo‘yicha kelishuvga erishdim», — dedi qo‘mita mutaxassisi Behruz Hamzayev.

Ma’lumot uchun, O‘zbekistonda 2019 yilning 1 fevralidan boshlab jami 64ta davlat fuqarolari uchun vizasiz rejim amalga kirdi. Prezidentning 5 yanvardagi «O‘zbekistonda turizmni tezkor rivojlantirish bo‘yicha qo‘shimcha chora-tadbirlar to‘g‘risida»gi farmoni bilan 30 kungacha bo‘lgan muddatga vizasiz kirish tartibi joriy etilgan mamlakatlar soni 19tadan 64taga yetdi.