Bokschimiz Shahram G‘iyosov professional ringdagi yettinchi g‘alabasini tantana qildi. U meksikalik Edgar Puertoga qarshi jangda raqibini texnik nokaut evaziga mag‘lub etdi.
Shahram mazkur jangdan so‘ng Milliy olimpiya qo‘mitasi matbuot va media departamentiga qisqa intervyu berdi.
«Birinchi navbatda meni qo‘llab-quvvatlab turgan barchaga rahmat aytmoqchiman. Biz fevral oyida jang bo‘lishini kutmagandik. Ammo, vaziyat shunday bo‘ldi. Meksikalik bokschi jangga chorladi, biz esa buni rad eta olmadik. Tayyorgarlik uchun kam vaqt – 25 kun bo‘ldi. Bundan tashqari, raqib yashaydigan mamlakatga safar qildik.
Jang haqida gapiradigan bo‘lsam, oson o‘tdi deya olmayman. Men raqibimdan bunday harakatlarni kutmagandim. Ringda qiyin, biroq yodda qolarli jang bo‘ldi. Yaxshigina tajriba to‘pladim. Shuni aytib o‘tishni istardimki, meksikalik bokschilar chidamli hisoblanadi. U besh raund chidab berdi. Qaysidir pallada nokaut bo‘lmasa kerak degan o‘y ham hayolimdan o‘tdi. Ammo, yakunda biz baribir murabbiy va menejerlarim bilan o‘ylagan rejamizga erishdik.
Yaqin kunlarda yana bir jangni kuting. 10 kundan so‘ng bu haqida e’lon qilamiz», – dedi Shahram G‘iyosov.
