Bugun Bekobod shahridagi texnika iqtisodiyoti kasb hunar kollejida o‘quvchi talabalar hamda “Metallurg” futbol klubi faxriy o‘yinchilari o‘rtasida uchrashuv bo‘lib o‘tdi.
Yangi mavsum arafasida uyushtirilgan bu tadbirdan asosiy ko‘zlangan maqsad Pepsi Superligasi o‘yinlariga tomoshabinlar oqimini oshirish, sanoatchilar shahrida futbol ommaviyligiga hissa qo‘shishdan iborat edi.
“Metallurg” futbol klubi marketing xizmati hamda O‘zbekiston Professional futbol ligasi hamkorligida tashkil etilgan tadbirda Bekobod futbolining faxriy o‘yinchilari – Ilyos Qurbonov, Abbos Abdullayev hamda Abduvali Mo‘minovlar ishtirok etishdi.
Shuningdek, yangi mavsum arafasida futbol ishqibozlarini qiziqtirgan savollarga O‘zPFL muxlislar bilan ishlash bo‘limi yetakchi mutaxassislari javob qaytarishdi.
Qiziqarli va jonli suhbat tarzida tashkil etilgan tadbirda ishqibozlar yangi mavsum yangiliklari, “Metallurg” futbol klubining bu yilgi maqsad va vazifalari, klubda muxlislarga yaratib beriladigan sharoitlar, imtiyozlar haqidagi savollariga javob olishdi. Eng bilag‘on hamda faol muxlislarga PFL hamda “Metallurg” futbol klubi tomonidan esdalik sovg‘alari topshirildi.
