Бугун Бекобод шаҳридаги техника иқтисодиёти касб ҳунар коллежида ўқувчи талабалар ҳамда “Металлург” футбол клуби фахрий ўйинчилари ўртасида учрашув бўлиб ўтди.
Янги мавсум арафасида уюштирилган бу тадбирдан асосий кўзланган мақсад Pepsi Суперлигаси ўйинларига томошабинлар оқимини ошириш, саноатчилар шаҳрида футбол оммавийлигига ҳисса қўшишдан иборат эди.
“Металлург” футбол клуби маркетинг хизмати ҳамда Ўзбекистон Профессионал футбол лигаси ҳамкорлигида ташкил этилган тадбирда Бекобод футболининг фахрий ўйинчилари – Илёс Қурбонов, Аббос Абдуллаев ҳамда Абдували Мўминовлар иштирок этишди.
Шунингдек, янги мавсум арафасида футбол ишқибозларини қизиқтирган саволларга ЎзПФЛ мухлислар билан ишлаш бўлими етакчи мутахассислари жавоб қайтаришди.
Қизиқарли ва жонли суҳбат тарзида ташкил этилган тадбирда ишқибозлар янги мавсум янгиликлари, “Металлург” футбол клубининг бу йилги мақсад ва вазифалари, клубда мухлисларга яратиб бериладиган шароитлар, имтиёзлар ҳақидаги саволларига жавоб олишди. Энг билағон ҳамда фаол мухлисларга ПФЛ ҳамда “Металлург” футбол клуби томонидан эсдалик совғалари топширилди.
