O‘tgan mavsumni Farg‘onaning “Neftchi” jamoasida o‘tkazgan tajribali futbolchi Sherzod Xakimov endilikda "Surxon" jamoasi sharafini himoya qiladi. Mahoratli futbolchi yangi mavsum oldidan fikrlari bilan o‘rtoqlashdi.

- Qishki o‘quv – yig‘in jarayonida bir qator klublardan takliflar bo‘ldi. Har bir klub taklifini diqqat bilan o‘rganib chiqdim. Ya’ni men tanlayotgan klub o‘z oldiga qanday maqsadlarni qo‘yganligi bilan qiziqdim. Yakunda, “Surxon” jamoasidan jiddiy taklif bo‘ldi va men bunga rozi bo‘ldim. Jamoada ichki muhit a’lo darajada. Hamma futbolchilar bilan deyarli birdek til topishib keta oldim.

Avvalo, butun Surxondaryo xalqini uzoq o‘n besh yillik tanaffusdan so‘ng yana Pepsi Superligaga qaytgani bilan tabriklayman. “Metallurg”ga qarshi jiddiy tayyorgarlik ko‘rmoqdamiz. Mashg‘ulotlarda astoydil ter to‘kmoqdamiz. Nasib qilsa 10 mart kuni “Metallurg” ustidan g‘alaba qozonib, butun Surxondaryo xalqini hursand qilamiz.

Jamoa o‘z oldiga bu yili kuchli beshlikka kirishni maqsad qilgan. Albatta, bunga erishish oson emasligini yaxshi his qilib turibmiz. Lekin, biz chempionatda chiroyli o‘yinlar ko‘rsatib, muhlislarimizni hursand qilish niyatidamiz.

Futbolda har bir xujumchi o‘z oldiga to‘purar bo‘lishni maqsad qiladi. Xujumchining vazifasi imkon qadar har bir o‘yinda gol kiritib, jamoaga muhim g‘alabani keltirishdir. Men ham bu yilgi mavsumda bor kuchimni ishga solib, to‘purar bo‘lishga harakat qilaman.