Avval xabar berganimizdek, Toshkentning “Lokomotiv” jamoasi OCHL guruh bosqichi 1-turida BAAning “Al Vahda” jamoasini qabul qilib, 2:0 hisobida g‘alaba qozondi.

O‘yindan so‘ng “Lokomotiv” jamoasi futbolchisi Diyor Turopov o‘z fikrlarini bildirib o‘tdi.

“Al Vahda”ga qarshi yaxshi o‘yin ko‘ratdik. Raqib jamoa ham mag‘lub bo‘lish uchun bu yerga kelmagan edi. Ular ham munosib qarshilik ko‘rsatdi.

Biz o‘z uyimizda muxlislarimiz ko‘z o‘ngida o‘ynadik. G‘alaba qozonmasak bo‘lmasdi. G‘alabaga bo‘lgan ishtiyoq bizda ko‘proq edi. Hujumda ham, himoyada ham yaxshi o‘yin ko‘rsatdik.

Yaqin kunlarda O‘zbekiston chempionatiga ham start beriladi. 1-turni “Paxtakor” jamoasiga qarshi o‘tkazamiz. Ushbu uchrashuv oldidan yaxshigina tayyorlanib oldik.

“Al Vahda” jamoasining hujum chizig‘i ko‘proq muammo tug‘dirdi. Raqibning ikki nafar legioneri bizni biroz qiynadi”, deydi Diyor Turopov.