Yana ikki kundan keyin Samarqandda Superliga-2019 ochilish uchrashuvi “Dinamo” – “Nasaf” o‘yini o‘tkaziladi.
Bir necha kundan buyon Samarqand shahrining turli chorrahalaridagi 24 ta yirik ekranlar (Sity TV)da “Dinamo” – “Nasaf” o‘yini afishasi namoyish etilmoqda. Qolaversa, uchrashuv anonsi “Samarqand TV” orqali ham berilmoqda. Klub singari stadionda ham Superliga bahsiga katta tayyorgarlik ishlari olib bormoqda.
Katta futbol havosini sog‘inib qolgan Samarqandda 9 mart, shanba kungi o‘yinda o‘yingoh muxlislar bilan to‘lishi kutilmoqda. Samarqand va Qashqadaryo qo‘shni viloyatlarning bosh klublari o‘rtasidagi uchrashuv hozirdan muxlislarning katta qiziqishlariga sabab bo‘lmoqda. Shanba kuni o‘yindan oldin soat 14:30dan boshlab konsert va ko‘rgazmali dasturlar, rasmiy ochilish marosimi o‘tkazish rejalashtirilgan. Taniqli san’atkorlar kuy-qo‘shiqlari bilan muxlislar oldida chiqish qilishadi.