Bugun “Qizilqum” futbolchilari yangi mavsumning ilk uchrashuvini Navoiyda “Andijon”ga qarshi boshlashadi. Navoiyliklar sardori Erkin Boydullayev yangi mavsum haqidagi fikrlari bilan o‘rtoqlashdi.

-Jamoamiz yangi mavsumga yaxshi tayyorgarlik ko‘rdi. Dastlab Navoiy va Toshkentda, keyin esa Turkiyada o‘quv-mashg‘ulot yig‘inini o‘tkazdik. Antaliyadagi yig‘in davomida kuchli raqiblar bilan kuch sinashdik. Bu o‘yinlar jamoaviy o‘yinimizni kuchayishiga xizmat qildi. Yangi 2019 yilgi mavsumda maqsadimiz har bitta bahsda g‘alaba qozonib, maksimal natijaga erishish va muxlislarni xursand etish. 

-“Andijon” kichik tanaffusdan so‘ng, yangi kuch, yangi ishtiyoq bilan Superligaga qaytdi. Jamoa muxlislari ham futbolni sog‘ingan. Ular o‘z jamolarini yaxshi qo‘llab-quvvatlashadi. Yaxshi futbolchilardan tashkil topgan jamoa. Dastlabki to‘rt-beshta turda  barcha jamoalar deyarli bir xil imkoniyatda, bir xil vaziyatda bo‘ladi. Jismoniy tayyorgarlik ham maromida bo‘ladi va so‘nggi daqiqalargacha kurashishadi. Shu bois har bir o‘yin muxlislarga ham shiddatli kurashni taqdim etadi, deb o‘ylayman.