Bugun, 10 mart kuni o‘zbekistonlik professional bokschi Isroil Madrimov ikkinchi jangini o‘tkazib muddatidan oldin g‘alaba qozondi.

Venesuelalik Frenk Roxasga qarshi ringga chiqqan Isroil Madrimov ikkinchi raundda raqibini nokautga uchratdi.

Ikkinchi raundda dastlab raqibining jigar va bosh qismiga kuchli zarbalarni bergan Isroil Roxasni nokdaun holatiga tushirdi. Roxas bu holatda o‘rnidan turishga muvaffaq bo‘ldi.

Isroilning ketma-ket zarbalaridan so‘ng Roxas yana yerga quladi. Ikkinchi urinishda raundning 1:46 soniyasi o‘tib borayotgan edi, Isroilning chap qo‘ldagi kross zarbasidan so‘ng raqib chuqur nokaut holatiga tushib qaytib turmadi.

Sportchi uzoq vaqt o‘ziga kela olmadi va uni maxsus zambillarga solgan holda olib chiqib ketishlariga to‘g‘ri keldi. O‘zbekistonlik bokschi esa g‘alabasini odatiy “salto” otish bilan nishonladi.

Ushbu g‘alaba evaziga Isroil Madrimov o‘zining WBA InterContinental chempionlik kamarini yana bir marotaba himoya qildi.

Isroil birinchi jangida meksikalik Vladimir Ernandesni 6 raundda texnik nokaut evaziga mag‘lubiyatga uchratib ushbu kamar sohibiga aylangan edi.