Bugun, 24 mart kuni Londonda yana bir ko‘rkam sport kompleksi foydalanishga topshiriladi.
«Tottenhem» klubining yangi stadionida bugun birinchi o‘yin o‘tkaziladi. «Tottenhem»ning 18 yoshgacha bo‘lgan yoshlar jamoasi sauthemptonlik tengdoshlari bilan bahs olib borishadi.
2016 yilda qurilishi boshlangan stadion hozircha «Tottenhem Hotspur» stadioni deb yuritilmoqda. Keyinchalik unga nom tanlanishi va balki arena nomi biror homiyga sotilishi ham mumkin.
Aprel oyida rasman ochilish marosimi o‘tkaziladigan va 62 062 muxlisni o‘z bag‘riga sig‘diradigan stadionning narxi 350-400 million funtga baholangan.
«Tottenhem»ning yangi stadioni reja bo‘yicha o‘tgan yilda ochilishi kerak edi, lekin turli muammolar sabab uning ochilishi kechikib ketdi.
