Бугун, 24 март куни Лондонда яна бир кўркам спорт комплекси фойдаланишга топширилади.

«Тоттенҳэм» клубининг янги стадионида бугун биринчи ўйин ўтказилади. «Тоттенҳэм»нинг 18 ёшгача бўлган ёшлар жамоаси саутҳэмптонлик тенгдошлари билан баҳс олиб боришади.

2016 йилда қурилиши бошланган стадион ҳозирча «Тоттенҳэм Ҳотспур» стадиони деб юритилмоқда. Кейинчалик унга ном танланиши ва балки арена номи бирор ҳомийга сотилиши ҳам мумкин.

Апрель ойида расман очилиш маросими ўтказиладиган ва 62 062 мухлисни ўз бағрига сиғдирадиган стадионнинг нархи 350-400 миллион фунтга баҳоланган.

«Тоттенҳэм»нинг янги стадиони режа бўйича ўтган йилда очилиши керак эди, лекин турли муаммолар сабаб унинг очилиши кечикиб кетди.