«Манчестер Юнайтед» ёзги трансфер бозорида таркибни кучайтириш режаларини тузмоқда. Manchester Evening News нашрининг хабар беришича, «қизил иблислар» ярим ҳимоячи Орельен Тчуаменини «Реал»дан ўз сафига ўтишга кўндиришга ҳаракат қилишга тайёр.
Матбуотда Тчуаменининг «Манчестер Юнайтед» билан боғланиши биринчи бор кузатилаётгани йўқ. Бу галги трансферга футболчининг яқинда Федерико Вальверде билан юзага келган можароси туртки бўлиши мумкин. Ушбу ҳодисадан сўнг «Реал» футболчилари 500 минг евро миқдорида жаримага тортилган эди.
Нуфузли Transfermarkt портали мутахассислари 26 ёшли Орельен Тчуаменини 75 миллион еврога баҳолашмоқда. Футболчининг «Мадрид» билан шартномаси 2028 йилнинг ўрталаригача мўлжалланган.













