"Барселона" ҳужумчиси Ламин Ямал Испания чемпионига айлангач, Мадриднинг "Реал" клуби ярим ҳимоячиси Жуд Беллингемнинг ўтган йилги гапларини ёдга олди.
Воқеалар ривожи ўтган йилнинг кузида бошланган эди. Ўшанда Ламин Ямал "Эл-Класико" олдидан бир қатор провокацион баёнотлар берган, аммо учрашувда "Реал" 2:1 ҳисобида ғалаба қозонган ва Ямал кучсиз ўйин кўрсатган эди.
Ўйиндан сўнг Беллингем ижтимоий тармоқларда Ямалнинг баёнотларига ишора қилиб: "Сўзларнинг ҳеч қандай қиймати йўқ", — деб ёзиб қолдирган эди.
Жорий мавсумнинг иккинчи даврасида эса "Барселона" "Реал"ни 2:0 ҳисобида мағлуб этиб, Испания чемпионлигини расмийлаштирди. Ламин Ямал жароҳати сабабли ушбу баҳсда майдонга туша олмаган бўлса-да, стадионда жамоаси билан бирга эди.
Ғалабанинг эртасига Ямал жамоадошларининг голни нишонлаётгани акс этган суратни жойлаштириб, Беллингемнинг иқтибосини сўзма-сўз такрорлади: "Сўзларнинг ҳеч қандай қиймати йўқ".
Шунингдек, футболчи ўз постига кўплаб кулги ва кўз ёши ифодаларини қўшиб қўйган. Мутахассислар буни ёш юлдузнинг мадридликларга нисбатан ўзига хос "реванши" сифатида баҳолашмоқда.
