«Реал» сафида клуб раҳбариятидан юлдуз футболчини сотиб юборишни сўраётган ўйинчилар бор. Гап ярим ҳимоячи Федерико Вальверде ҳақида кетмоқда, у ўтган ҳафтада Орельен Тчуамени билан жиддий можарога борган эди.
Журналист Рамон Альварес де Моннинг хабар беришича, Вальвердени сотишни талаб қилаётган футболчилар кийиниш хонасида катта нуфузга эга. Қайд этилишича, «Реал» раҳбарияти учун бу анча нозик масала, чунки Вальверде жамоа сардорлари гуруҳига киради ва алоҳида мақомга эга.
27 ёшли Федерико Вальверде Transfermarkt портали томонидан 120 миллион еврога баҳоланган. Уругвайлик футболчининг амалдаги шартномаси 2029 йилнинг ўрталаригача мўлжалланган.
