Xabaringiz bor, Yaponiyaning "Vanfore Kofu" klubi O‘zbekiston hamda Yaponiya futbol assosiasiyalari o‘rtasidagi o‘zaro memorandumga asosan mamlakatimizga tashrif buyurib, bolalar va o‘smirlar futbol akademiyalari bilan o‘rtoqlik uchrashuvlari o‘tkazdi.

 Jumladan, yaponiyaliklar 3 va 4 aprel kunlari Samarqand va Toshkent futbol akademiyalariga qarshi maydonga tushishdi. Bundan tashqari, "Milliy" stadionda "Vanfore Kofu" jamoasi ishtirokida xalqaro musobaqa tashkil etildi. Unda "Paxtakor", "Bunyodkor" va "Nasaf" klublari akademiyalari qatnashdi.   

Musobaqa yarim finalida "Vanfore Kofu" klubi "Bunyodkor" akademiyasiga qarshi bahs olib borib, 0:2 hisobida mag‘lubiyatga uchradi. Ikkinchi yarim finalda "Nasaf" akademiyasi xuddi shu hisobda "Paxtakor" akademiyasi tarbiyalanuvchilarini taslim etdi.  3-o‘rin uchun bahsda "Vanfore Kofu" "Paxtakor"ga qarshi maydonga tushib, 2:3 hisobida mag‘lubiyatga uchradi. Finalda esa "Bunyodkor" akademiyasi "Nasaf" tarbiyalanuvchilarini kichik hisobda taslim etdi. Shu tariqa "Bunyodkor" birinchi, "Nasaf" ikkinchi, "Paxtakor" uchinchi va "Vanfore Kofu" klubi to‘rtinchi o‘rinni egalladi.   Bugun Yaponiya klubi "Chig‘atoy" sport majmuasida Namangan va Andijon akademiyasi tarbiyalanuvchilariga qarshi o‘rtoqlik o‘yini o‘tkazadi. Uchrashuv soat 14:30da boshlanadi.