“Lokomotiv” Osiyo chempionlar ligasi 3-tur bellashuvini safarda o‘tkazadi.

“Temiryo‘lchilar” Saudiya Arabistonining Jidda shahrida “Al Ittihod” mehmoni bo‘lishadi. O‘yindan oldingi matbuot anjumanida ishtirok etgan “Loko” futbolchisi Oleg Zoteev o‘z fikrlarini bildirib o‘tdi.

“Bosh murabbiyimizning aytganlariga qo‘shilaman. Bugun hammamizni chiroyli futbol kutib turibdi deb o‘ylayman. Bu o‘yinda kim g‘olib chiqsa, keyingi bosqichga chiqish uchun yaxshi imkoniyatga ega bo‘ladi. Ayni paytda guruhdagi barcha jamoalarda uch ochkodan bor, bu esa qolgan turlar ham qiziq o‘tishini bildiradi”.

O‘yin muxlislarsiz kechadi. OFK qarori tufayli stadion ikkita o‘yinga diskvalifikasiya qilingan. Bu mehmon sifatida sizlarga yordam beradimi?

“Avvalo muxlislarsiz futbol Osiyo futbolini ko‘tarishga yordam bermaydi. Qolaversa Osiyo chempionlar ligasi nufuzini oshirish uchun muxlislar kerak.

Lekin bu OFKning qarori. Bo‘sh tribunalar qarshisida biz erkin o‘ynaymizmi? Aslida futbolchi ishqibozlar ko‘z o‘ngida to‘p tepsam deydi. Bu ham ko‘proq kuch bag‘ishlaydi.

O‘ylaymanki, bu o‘yinga muxlislar kiritilmasligi uchrashuvga bo‘lgan e’tiborni tushirmaydi. Har ikki jamoa bor kuchini berib harakat qiladi. Menga qayerda bo‘lmasin tomoshabinlar ko‘z o‘ngida futbol o‘ynagan ma’qul deb o‘ylayman”.