“Локомотив” Осиё чемпионлар лигаси 3-тур беллашувини сафарда ўтказади.

“Темирйўлчилар” Саудия Арабистонининг Жидда шаҳрида “Ал Иттиҳод” меҳмони бўлишади. Ўйиндан олдинги матбуот анжуманида иштирок этган “Локо” футболчиси Олег Зотеев ўз фикрларини билдириб ўтди.

“Бош мураббийимизнинг айтганларига қўшиламан. Бугун ҳаммамизни чиройли футбол кутиб турибди деб ўйлайман. Бу ўйинда ким ғолиб чиқса, кейинги босқичга чиқиш учун яхши имкониятга эга бўлади. Айни пайтда гуруҳдаги барча жамоаларда уч очкодан бор, бу эса қолган турлар ҳам қизиқ ўтишини билдиради”.

Ўйин мухлисларсиз кечади. ОФК қарори туфайли стадион иккита ўйинга дисквалификация қилинган. Бу меҳмон сифатида сизларга ёрдам берадими?

“Аввало мухлисларсиз футбол Осиё футболини кўтаришга ёрдам бермайди. Қолаверса Осиё чемпионлар лигаси нуфузини ошириш учун мухлислар керак.

Лекин бу ОФКнинг қарори. Бўш трибуналар қаршисида биз эркин ўйнаймизми? Аслида футболчи ишқибозлар кўз ўнгида тўп тепсам дейди. Бу ҳам кўпроқ куч бағишлайди.

Ўйлайманки, бу ўйинга мухлислар киритилмаслиги учрашувга бўлган эътиборни туширмайди. Ҳар икки жамоа бор кучини бериб ҳаракат қилади. Менга қаерда бўлмасин томошабинлар кўз ўнгида футбол ўйнаган маъқул деб ўйлайман”.