Xabaringiz bor, O‘zbekiston Professional futbol ligasi 2018 yilgi mavsumning har oyidan keyin to‘rt yo‘nalish bo‘yicha eng yaxshilarni aniqlab keldi: eng yaxshi murabbiy, eng yaxshi futbolchi, eng yaxshi darvozabon va eng chiroyli gol. Tashkil etilgan so‘rovnoma yakunlariga ko‘ra eng ko‘p ovoz to‘play olgan nomzodlar tashkilotning eng yaxshilar uchun atalgan statuetkalarini qabul qilib olishdi.
2019 yilgi mavsumda ham mazkur an’anani davom ettiramiz. Eng yaxshilarni aniqlash shartlari o‘zgarmaydi. Coca Cola Superliganing 14 klubi bosh murabbiylari hamda sardorlari ko‘rsatilgan nomzodlarni uchtalikka joylashtirib chiqadi. Dastlabki o‘rinda ko‘rsatilgan nomzod 3, mos ravishda keyingi ikki o‘rindagilar 2 va 1 ochkolik bo‘ladi. Shuningdek, Tribuna.uz nashri futbol muxlislari o‘rtasida so‘rovnoma o‘tkazadi. Bunda muxlislar ovozi katta ahamiyatga ega bo‘lib, birinchi o‘rinni egallagan nomzod 6, mos ravishda keyingilar 4 va 2 ochkodan qo‘lga kiritadi. Yakunda eng ko‘p ball to‘plaganlar oyning eng yaxshilari sifatida e’tirof etiladi.
Ortda qolgan mart oyida Coca Cola Superliga-2019 start oldi. Superliga doirasida jamoalar 2 ta tur o‘yinlarini o‘tkazishdi. Mazkur uchrashuvlar davomida bir qator kiritilgan chiroyli gollar muxlis-u mutaxassislar olqishiga sazovor bo‘ldi.
Mart oyining eng chiroyli golini aniqlash maqsadida tashkil etilgan so‘rovnomada “Paxtakor” jamoasi to‘purari Dragan Cheranning “Lokomotiv” jamoasi darvozasiga kiritgan ikkinchi goli eng ko‘p ovoz yig‘di. Mazkur gol ikkinchi pog‘onadan joy olgan Islom Kenjaboyevning “So‘g‘diyona”ga urgan golidan 4 ochkogagina ilgarilab ketdi.
Qaysi murabbiy va futbolchi kimga ovoz bergani PFL saytida barcha g‘oliblar ma’lum bo‘lgach e’lon qilinadi.
