Osiyo futbol konfederasiyasi shtab-kvartirasi joylashgan Malayziyaning Kuala-Lumpur shahrida murabbiylik ta’limi bo‘yicha OFKning 3-konferensiyasi davom etmoqda. Mazkur konferensiyada O‘zbekistondan Shavkat Imamov bilan birgalikda FIFA va OFK instruktori Islom Ahmedov ham qatnashyotgani haqida xabar berib o‘tgandik.
Konferensiyaning bugungi kun tartibidan OFKga a’zo mamlakatlarda murabbiylik ta’limi bo‘yicha muammo va kamchiliklarni muhokama qilish o‘rin olgan. Shuningdek, konferensiya davomida FIFAdan maxsus taklif etilgan Basir Muhammad mazkur mavzu yuzasidan chiqish qilishi rejalashtirilgan. Kunning ikkinchi qismida konferensiya qatnashchilari joriy yilning yanvar-fevral oylarida BAAda bo‘lib o‘tgan Osiyo Kubogida qatnashgan terma jamoalar murabbiylarining muvaffaqiyatli faoliyatlarini tahlil qilishadi.
Bundan tashqari, murabbiylik ta’limi bo‘yicha OFK Konvensiyasi talablari va ularni amalga oshirish masalasi ham ko‘rib chiqiladi.
OFKning murabbiylik ta’limi bo‘yicha 3-konferensiyasi ertaga o‘z yakuniga yetadi.