21-24 aprel kunlari Qatar poytaxti Doxa shahrida yengil atletika bo‘yicha Osiyo chempionati bo‘lib o‘tadi. 23-marotaba tashkil etilayotgan qit’a birinchiligida O‘zbekiston milliy terma jamoasi ham ishtirok etadi.
Shuningdek, chempionat doirasida Osiyo yengil atletika federasiyalari assosiasiyasining navbatdagi Kongressi o‘tkaziladi. Unda O‘zbekiston jismoniy tarbiya va sport vazirligi boshqarma boshlig‘i Nizomjon To‘xtaboyev, O‘zbekiston yengil atletika federasiyasi prezidenti Andrey Abduvaliyev va federasiya bosh kotibi Kamolliddin Ro‘zimuxammedov ham ishtirok etadi.
Jamoamiz 6 apreldan Turkiyaning Antaliya shahrida navbatdagi o‘quv-yig‘in mashg‘ulotida ushbu chempionatga va 2020 yil Tokio shahrida bo‘lib o‘tadigan XXXII yozgi Olimpiya o‘yinlari tayyorgarlik ko‘rayotgan edi.
Doxadagi “Xalifa” stadionida o‘tkaziladigan chempionatda musobaqa tashkilotchilari xabariga ko‘ra 44 davlatdan tashrif buyurgan sportchilar 186 ta medallar jamlanmasi uchun bahs olib boradi.
Osiyo chempionatida Nadiya Dusanova, Svetlana Radzivil, Nigina Sharipova, Roksana Xudoyorova, Yekaterina Voronina, Aleksandra Yurkevskaya, Sanobar Erkinova, Ivan Markelov, Alina Yablokova, Marat Haydarov, Suhrob Xodjayev, Ivan Denisov, Sergey Dementyev va Nikita Loginov mamlakatimiz sharafini himoya qiladi.
