FIFA va “Gazprom” kompaniyasi tomonidan o‘tkaziladigan “Futbol do‘stlik uchun” xalqaro bolalar loyihasining yettinchi mavsumi start olgani xabar berib o‘tgandik.

Loyihaning asosiy maqsadi butun dunyodagi yosh avlod o‘rtasida do‘stlik, tinchlik, turli millat va madaniyat vakillariga hurmat kabi yuksak insoniy tushunchalarni targ‘ib qilishdan iborat. 2019 yilda “Futbol do‘stlik uchun” loyihasida 211ta mamlakat vakillari ishtirok etishadi. Mavsumning yakuniy tadbirlari 28 may - 2 iyun kunlari Madrid shahrida bo‘lib o‘tadi. “Futbol do‘stlik uchun” loyihasi butun dunyodagi bolalarni birlashtiradi. Ular o‘rtasida futbol bo‘yicha turnir tashkil etiladi. Loyihaning o‘ziga xosligi shundaki, joriy yilda ekologiya muammolariga katta ahamiyat qaratiladi. Shu maqsadda butun dunyodan keladigan bolalardan tashkil topadigan futbol jamoalar noyob va yo‘qolib borayotgan jonivorlar nomi bilan ataladi.

O‘zbekiston futbol Assosiasiyasi mazkur loyihada uchinchi marta ishtirok etadi. Bu yil O‘zbekiston sharafini yosh darvozabon, himoyachi, yarim himoyachi hamda yosh murabbiy himoya qiladi. Shu munosabat bilan O‘zbekiston futbol assosiasiyasining sun’iy qoplamali maydonida nomzodlarni saralab olish jarayoni bo‘lib o‘tdi. Saralash jarayoni uch bosqichda o‘tkazildi: jismoniy holat va sport mahoratini namoyon qilish, xorijiy tillarni bilish darajasini tekshirish va atrofdagilar bilan muloqot qilish qobiliyatini ko‘rsatish. Komissiya qaroriga ko‘ra nomzodlar orasidan munosiblar tanlab olindi. Unga ko‘rsa bu yil "Futbol do‘stlik uchun" loyihasida O‘zbekiston sharafini Asilbek No‘’monov ("Nasaf" akademiyasi), Abdulla Tursunboyev ("Chig‘atoy" futbol maktabi), Asadbek Ro‘zimov ("Yashnobod") va Marina Kosnikova ("Bunyodkor" akademiyasi) himoya qiladigan bo‘ldi.

O‘zbekiston futbol assosiasiyasi saralashdan o‘tgan barcha yosh futbolchilarga loyihada omad tilaydi va O‘zbekiston sharafini munosib himoya qilishni tilab qoladi!