Chempionlar Ligasi 5-turida “Persepolis” bilan uchrashuv arafasida “Paxtakor” bosh murabbiyi Shota Arveladze va jamoa sardori Yegor Krimes matbuot anjumanida ishtirok etishdi.
Arveladze: -Oldinda bizni juda qiyin o‘yin kutmoqda. Agar guruhdagi vaziyatga qarasak ham buni tushunib olish mumkin. “Persepolis” hozir to‘plagan ochkodan ko‘prog‘iga munosib ammo bu futbol. Ular kuchli va juda yaxshi shakllangan jamoa.
Raqib doim bir xil o‘ynaydi. Ertaga ham agressiv va hujumkor o‘yin kutyapman. “Persepolis”ning safarda yomon o‘ynayotganiga qo‘shilmayman. Ular safarda yomon o‘ynashmayapti. Bitta bahsni neytral maydonda o‘tkazishdi, futbolda kim ko‘proq gol ursa o‘sha jamoa g‘olib bo‘ladi.
Bizda yo‘qotishlar bor. Jasur Yaxshiboyev jarohat olgan. Dostonbek Hamdamovda esa sariq kartochkalari soni ikkita bo‘lgan.
G‘alabaning ahamiyati juda yuqori. “Liverpul” kabi yaxshi o‘ynab yutqazgandan ko‘ra yomon o‘ynab yutgan yaxshi.
Krimes: - Ertangi o‘yinda ko‘p narsa hal bo‘ladi. Bizga faqat g‘alaba kerak, qolgan barcha natija bizni qiyin ahvolga solib qo‘yadi. Muxlislardan faol bo‘lishlarini so‘rab qolardim. Tehronda bizga qarshi o‘yinda stadionda ajoyib muhit yuzaga keltirishgandi. Endi raqib ham buni o‘zida his qiladigan holat yetib keldi. Ishqibozlarning bizga ruhiy ko‘mak berishlariga umid qilaman.
