Milliy olimpiya qo‘mitasi va O‘zbekiston futbol assosiasiyasi tomonidan mamlakatimizdagi sportchilar, xususan, futbolchilarning salomatliklarini ta’minlash, ularga sifatli tibbiy xizmat ko‘rsatilishini ta’minlash maqsadida bir qator chora-tadbirlar amalga oshirilmoqda. Jumladan, Milliy olimpiya qo‘mitasi tashabbusi bilan turkiyalik mashhur travmotolog-ortoped, tibbiyot fanlari doktori Melix Malkoch 6 may kuni Toshkentga tashrif buyurib, mamlakatimizdagi sportchilarga bepul konsultasiyalar o‘tkazishi haqida xabar berib o‘tgandik.
Turkiyalik mashhur shifokor tirsak bo‘g‘imlari epikondiliti, bilak tendeniti, boldir bo‘g‘imlari tendeniti, tizzadagi menisk uzilishi, oyoqdagi old va orqa xochsimon to‘qimalar uzilishi, yelka va beldagi jarohatlar, tovon fassiiti, asseptik nekroz kabi kasalliklar bo‘yicha o‘z maslahatlarini berib o‘tdi.
Ma’lumot o‘rnida ta’kidlab o‘tish zarur, Melix Malkoch artroskopik jarrohlik, bo‘g‘imlar jarrohligi, bo‘g‘imlar himoyasi va sportchilar fiziologiyasi bo‘yicha ish olib boruvchi mashhur shifokor hisoblanadi. U Istambulda 15 yildan beri muvaffaqiyatli faoliyat olib bormoqda. O‘z vaqtida Turkiya futbol assosiasiyasida futbolchilarning jismoniy ko‘rsatkichlarini nazorat qilish bo‘yicha bosh mutaxassis, tibbiy maslahatchi sifatida ishlagan.
