Qozog‘istonning Chimkent shahrida boks bo‘yicha Olimpiya o‘yinlari sovrindori, Qozog‘iston Respublikasida xizmat ko‘rsatgan sport ustasi Muxtarxan Dildabekov sovrini uchun musobaqa nihoyasiga yetdi.
2001-2002 yilda tavallud topgan bokschilar o‘rtasidagi musobaqada o‘zbekistonlik charm qo‘lqop ustalari ham ishtirok etishdi.
Bugun final janglari o‘tkazildi va unda uch nafar bokschimiz ringga ko‘tarildi. Final dasturidan o‘rin olgan janglarda -64 kg vazn toifasidagi bokschimiz Javlonbek Yuldashev qozog‘istonlik Darzan Duysebayni (3:0) mag‘lub etdi. -60 kg vaznli Rahmatullo Toshpo‘latov mezbon bokschi Aytjan Ashirxanga 1:2 hisobida yutqazib qo‘ydi. -75 kg vazn toifasidagi Komiljon Yusupov esa boshqa bir qozog‘istonlik bokschi Yerasil Jakpekovga imkoniyatni boy berdi.
Shu tariqa, murabbiylar Hamid Tangribergenov, Sirojiddin Naimov, Botirjon Mahmudov va Hamza Avezov boshchiligida musobaqada ishtirok etgan O‘zbekiston terma jamoasi Chimkentdagi musobaqada 1 ta oltin, 2 ta kumush va 5 ta bronza medaliga sazovor bo‘ldi va umumjamoa hisobida ikkinchi o‘rinni egalladi. Bu borada mezbonlar Qozog‘iston terma jamoasi birinchi bo‘ldi.
Terma jamoamiz safida sovrindor bo‘lgan sportchilar:
Oltin:
-64 kg: Javlonbek Yo‘ldoshev
Kumush:
60 kg: Raxmatullo Toshpo‘latov
-75 kg: Komiljon Yusupov
Bronza:
49 kg: Avazjon Yo‘ldoshev
52 kg: Mirzabek Mirzahalilov
81 kg: Shohjahon Abdullayev
91 kg: Muhammadqodir Ne’matov
+91 kg: Shoxrux Almatov
