Rio Olimpiadasi ishtirokchisi, hozirda professional boksda faoliyat olib borayotgan bokschimiz Xurshid Tojiboyev navbatdagi jangini qachon o‘tkazishi ma’lum bo‘ldi. 

Unga ko‘ra, hamyurtimiz 18 may kuni Daniyaning Orxus shahrida tashkil etiladigan jang oqshomida ringga chiqadi. O‘sha kuni bokschimizga gruziyalik Irakli Shariashvili raqiblik qiladi. 

Ma’lumot uchun, Tojiboyev prof ringdagi ilk jangini shu yilning 23 mart kuni Polshada mezbon bokschi Kristof Rogovskiga qarshi o‘tkazib, uchinchi raundda nokaut evaziga g‘alaba qozongandi. 

Irakli Shariashvili esa shu kungacha prof boksda 8 marotaba ringga ko‘tarilib, ularning 5 tasida g‘alaba qozongan. 2 marotaba mag‘lub bo‘lgan (1 ta nokaut). 

Yana 1 marta esa durangga erishgan.  Aytgancha, 18 may kuni Daniyada tashkil etiladigan jang oqshomida shuningdek boshqa bir bokschimiz, Olimpiya o‘yinlari g‘olibi Shahobiddin Zoirov ham ringga ko‘tariladi.

Zoirov 18 may kuni Daniyaning Orxus shahrida tashkil etiladigan boks oqshomida professional boksdagi ikkinchi jangini o‘tkazadi. 

O‘sha kuni hamyurtimizga gruziyalik Mishiko Shubitidze raqiblik qiladi. Ma’lumot uchun, Shubitidze shu kungacha prof boksda 28 marotaba jang o‘tkazgan va ularning 12 tasida g‘alaba qozongan (5 ta nokaut). 

13 marotaba mag‘lubiyatga uchragan (11 ta nokaut). 3 marotaba durang qayd etgan. Shahobiddin esa shu yilning 5 aprel kuni BAAda prof ringdagi debyutini nishonlagan va unda indoneziyalik Antoni Xoltni birinchi raunddayoq nokautga uchratgandi.