Samarqand shahridagi “Dinamo” tennis kortlarida xalqaro tennischilar uyushmasi taqvimidan o‘rin olgan "Chellenjer" musobaqasi boshlandi.   — O‘n besh yildan buyon Samarqandda tennis bo‘yicha "Chellenjer" turniri yuqori saviyada o‘tkazib kelinadi, — deydi musobaqa supervayzeri Andrey Karnilov. — O‘tgan davr mobaynida mutasaddilarning musobaqaga bo‘lgan yuksak e’tibori natijasida har yilgi bahslar qiziqarli o‘tib, ishtirokchilar soni ortib bormoqda. Joriy yilgi bahslarda 24 davlatdan 53 nafar mahoratli tennischi ishtirok etmoqda. Albatta, sport musobaqalari muxlislar olqishi, qo‘llab-quvvatlashi bilan yanada qiziqarli o‘tadi.      Samarqandda muxlislarning madadi tennischilarga kuch bag‘ishlamoqda. O‘ylaymanki, bu yilgi musobaqa shiddatli va qiziqarli bahslarga boy bo‘ladi.   Ta’kidlash joizki, musobaqada mamlakatimiz tennischilaridan 8 nafari ishtirok etayotgan edi. Asosan yosh tennischilardan iborat vakillarimiz yakkalik bahslarining saralash va birinchi bosqich o‘yinlaridayoq ishtiroklarini to‘xtatdi. Musobaqaning juftlik bahslarida hamyurtlarimiz kurashni davom ettirmoqda.   Sovrin jamg‘armasi 54 160 AQSH dollaridan iborat xalqaro musobaqa g‘oliblari 19 may sanasida aniqlanadi. Bunda yakkalik bahslarining finalida g‘olib bo‘lgan tennischi 7200 AQSH dollarini qo‘lga kiritadi. Juftlik bahslarida g‘alabaga erishgan sportchilar 3100 AQSH dollarini o‘zaro taqsimlab olishadi.