Bugun 76 yoshini nishonlayotgan "Paxtakor" afsonasi haqida kitob chop etildi.

Futbol haqida 30dan ortiq kitoblar muallifi Vladimir Safarov va Sergey Danilov tomonidan birgalikda yozilgan "O‘zbek futboli afsonasi" kitobi Birodar Abduraimov 76 yoshini qarshi olayotgan kunda kitobxonlar e’tiboriga taqdim etildi. Unda futbolimiz afsonasining futbolga kirib kelishi, hayoti, o‘yinchilik va murabbiylik faoliyati, u haqida turli insonlarning fikrlari o‘rin olgan.

Birodar Abduraimovning o‘zi ushbu taqdimotda quyidagi fikrlarni bildirdi:
- Yoshligimda kurash bo‘yicha mamlakat chempioni bo‘lganman va keyinchalik oldimda futbol yoki kurashdan birini tanlash masalasi turardi. Men futbolni tanlashga qaror qildim. Eski shaharda yashaganman, oilamizda yetishmovchilik bo‘lardi. Agar kun bo‘yi futbol o‘ynamagan taqdirimda bezori bo‘lib ketishim hech gap emasdi. Futbolni tanlaganim, mehnat qilganim tufayli mamlakat terma jamoalari safida o‘ynash nasib qildi. Yaqindagina bir ishqiboz men uch gol urgan uchrashuvdan keyin chop etilgan gazetani saqlashini aytganda juda xursand bo‘lib ketdim. Meni futbol sababli hamon eslaydiganlar ko‘p, demak bekorga yashamabman. Futbolni tanlaganimdan baxtiyorman. Barchani ko‘rib turganimdan xursandman va bu yerga kelganingiz uchun katta rahmat.

Taqdimot yakunida muallif va futbolimiz afsonasi yig‘ilganlarga kitobni dastxatlari bilan taqdim etishdi.