Jamoamizning Coca Cola Superliganing 9-tur doirasidan o‘rin olgan “Nasaf”ga qarshi bo‘lib o‘tadigan o‘yini ikki tomonning kelishuviga ko‘ra, Qarshi shahrida o‘tkaziladigan bo‘ldi.

Ma’lumki Qo‘qondagi “Markaziy” stadionning chimi yangilanishi bois stadionimizda ta’mirlash ishlari olib borilayotgan edi. Ayni paytga kelib, “Markaziy” stadionning maydoni barchaning havasini keltiradigan darajaga keldi. Biroq, mutaxassislar yana biroz sabr qilishni tavsiya etishdi va klubimiz rahbariyati esa mutaxassislarning fikrlarini inobatga olishdi. Hozir shoshma-shosharlik bilan o‘yin o‘tkazib, yana maydon borasidagi muammolarga duch kelmaslik uchun ham shunday qarorga kelindi.

Aytgancha, stadionning yoritkichlari ham ta’mirlandi va zamonaviy ko‘rinishga keltirildi. Qo‘shimcha yoritgichlar o‘rnatilib , PFL talab qilayotgan yorug‘likni ta’minlashga erishildi.
Shuning uchun yangi ta’mirdan chiqarilgan stadionimizda mavsumning birinchi o‘yinini iyun oyida o‘tkazadigan bo‘ldik. Stadionimizdagi dastlabki bahsda muxlislarimiz “Markaziy” stadionning yangicha va zamonaviy ko‘rinishdagi qiyofasidan baharamand bo‘lishadi.

Jamoamiz a’zolari “Bunyodkor” bilan bo‘lgan bahsdan keyin Toshkentda navbatdagi uchrashuvga tayyorgarlikni davom ettirishmoqda. Barcha Qarshidagi uchrashvda muxlislarni xursand qilish yo‘lida tinimsiz mehnat qilmoqda. «Nasaf» - «Qo‘qon-1912» jamoalari o‘rtasidagi uchrashuv 18-may kuni Qarshidagi «Markaziy» stadionida bo‘lib o‘tadi.

"Qo‘qon-1912" matbuot xizmati.