«Manchester Siti» bosh murabbiyi Xosep Gvardiola jamoani tark etib, yozda «Yuventus»ni qabul qilib olishi haqida tarqalgan xabarlarni "shaharliklar" rahbariyati inkor qildi.

Matbuotda tarqalgan xabarlarga ko‘ra, ispaniyalik mutaxassis 4 iyun kuni "byankoneri" bilan shartnoma imzolaydi, oradan 10 kun o‘tib — 14 iyun kuni bu haqda rasman e’lon qilinadi.

«Jamoa direktorlar kengashi a’zosi sifatida tarqalgan xabarlardan hayron bo‘ldim. U bizning murabbiy, u jamoamizda qolishni istaydi. U haqida yozilgan xabarlar — yolg‘on. Birinchidan, bunday ishni amalga oshirishni istagan jiddiy jamoa boshqa klub bilan aloqaga chiqadi. «Manchester Siti» bunday gaplardan bexabar. Bo‘layotgan gap-so‘zlarda asos yo‘q. Gvardiola «Manchester Siti»ni tark etmasligi haqida alohida bayonot berishi shart emas. Boisi, bunday muammoning o‘zi mavjud emas", — dedi "Manchester Siti" direktorlar kengashi a’zosi Alberto Galassi Sky Sport Italia nashriga bergan intervyusida.

Gvardiola 2016 yildan beri «Manchester Siti»ni boshqarib kelmoqda. Uch yillik faoliyati davomida u "shaharliklar" bilan 6ta sovrinni qo‘lga kiritdi. Uning amaldagi shartnomasi 2021 yilga qadar tuzilgan.