Erkaklar o‘rtasida qozog‘istonlik Rinat Jumabayev, ayollar orasida hamyurtimiz Gulruhbegim Tohirjonova peshqadamlik qilmoqda.    Xabar berganimizdek, poytaxtimizdagi Xalqaro shaxmat akademiyasida Jahon kubogi uchun Markaziy Osiyo mintaqasi saralash bahslari bo‘lib o‘tmoqda.   Kecha musobaqaning 3-tur o‘yinlari o‘tkazildi. Jami 25 nafar ishtirokchi g‘oliblik uchun dona surayotgan erkaklar o‘rtasidagi musobaqalarda ikkinchi tartib raqami bilan saralangan qozog‘istonlik grossmeyster Rinat Jumabayev oq donalarda o‘z hamyurti Murtaz Kazgaleevdan ustun keldi va uch imkoniyatdan uch ochko jamg‘argan holda peshqadamlik qilmoqda.   Musobaqaning eng nomdor ishtirokchisi, 17-jahon chempioni Rustam Qosimjonov esa bu turda yana bir qozog‘istonlik grossmeyster Pyotr Kostenkoni mag‘lub etdi. Natijada Rustam o‘z ochkolari sonini 2,5taga yetkazib olgan holda Jumabayevni ta’qib qilmoqda.     Peshqadamlar safida borayotgan 19 yoshli shaxmatchimiz, xalqaro master Ortiq Nig‘matov ham 3-turda g‘alaba qozondi. U oq donalarda qozog‘istonlik sport ustasi Ansat Aldiyorni dog‘da qoldirdi va 2,5 ochko bilan qo‘shimcha ko‘rsatkichlarga ko‘ra Qosimjonovdan keyingi 3-pog‘onani egallab turibdi.   3-tur o‘yinlarida hamyurtlarimiz Tohir Vohidov va Nodirbek Yoqubboyev durangga imzo chekishgan bo‘lsa, jahonning eng yosh grossmeysterlaridan bo‘lmish Nodirbek Abdusattorov esa hamyurti Abdumalik Abdusalimovdan ustun keldi.   Ayollar o‘rtasidagi 3-tur o‘yinlarida xalqaro grossmeyster Gulruhbegim Tohirjonova muhim g‘alabaga erishdi. Turnirda birinchi raqam ostida tasniflangan Tohirjonova qora donalarda o‘ynagan bo‘lishiga qaramay qozog‘istonlik Madina Davletbayevani mag‘lub etdi va jahon kubogi sari muhim qadam tashladi.   Hamyurtimiz Nilufar Yoqubboyeva esa 3-turda yana bir qozog‘istonlik shaxmatchi Bibisara Assaubayevadan ustun keldi. Yana bir grossmeysterimiz Sarvinoz Qurbonboyeva esa Qozog‘iston terma jamoasi a’zosi Gulisxan Naxbayeva bilan durangga imzo chekdi. Shuningdek, iste’dodli shaxmatchimiz Bahora Abdusattorova ham qozoq shaxmatchisi Meruyert Kamalidenovani mag‘lub etdi.   3-turdan keyin Tohirjonova 3 ochko bilan peshqadamlik qilmoqda. Nilufar Yoqubboyeva 2,5 ochko bilan 2-pog‘onani band etgan. Keyingi pog‘onalardan joy olgan biryo‘la besh nafar shaxmatchi hisobida bir xil – 2tadan ochko mavjud.   Bugun kunning ikkinchi yarmida ishtirokchilar 4-tur doirasida o‘zaro dona surishadi.