O‘zbekiston futbol assosiasiyasi tomonidan turli yoshdagi terma jamoalarimiz yirik musobaqalarga munosib tayyorgarlik ko‘rishlarini ta’minlash uchun yurtimizda bir qator kuchli terma jamoalar bilan o‘rtoqlik o‘yinlari tashkil etayotganidan xabaringiz bor.
Ko‘p hollarda mana shu o‘yinlar uchun chiqariladigan chiptalar olib-sotarlar tomonidan katta miqdorda sotib olinib, keyin o‘z narxidan ancha qimmat narxga sotilayotgani aksariyat muxlislarning e’tiroziga sabab bo‘layotgandi. Ana shunday salbiy holatlarning oldini olish uchun O‘zbekiston futbol assosiasiyasi tomonidan bir qator chora-tadbirlar amalga oshirilmoqda. Jumladan, O‘FA mamlakatimizda bu sohada faoliyat yuritayotgan va katta tajribaga ega bo‘lgan iTicket.UZ kompaniyasi bilan hamkorlikni yo‘lga qo‘ydi.
iTicket.UZ - har kanday miqyosdagi tadbirlar uchun chiptalarni onlayn va offlayn tarzda sotish innovasion tizimi bo‘lib, bu kompaniya sayti orqali turli tadbirlarga, shu jumladan, sport tadbirlariga chipta xarid qilish imkoniyati mavjud. Chiptalar xaridini tunu-kun onlayn tarzda yoki kompaniya operatorlari orqali amalga oshirish mumkin. Muxlislar veb-sayt orqali chiptalarni o‘z uylarini tark etmagan holda o‘zlari uchun qulay vaqtda xarid qilish imkoniyatiga ega bo‘lishadi.
