Andijon viloyati hokimi Shuhratbek Abdurahmonovning viloyatda millionlar o‘yiniga bo‘lgan yuksak e’tibori, jamoamizni doimiy ravishda qo‘llab-quvvatlashi, har bir uy uchrashuvlarimizga shaxsan tashrif buyurishi tabiiyki andijonlik minglab ashaddiy muxlislarni quvontirmoqda. "Andijon" jamoasining natijasiga befarq bo‘lmagani uchun ham klubimiz prezidenti - Shuhratbek Abdurahmonov bosh murabbiy masalasini zudlik bilan ko‘rib chiqishni, lozim bo‘lsa xorijlik malakali mutaxassisni jal etish va bu orqali ijobiy natiajalarga erishib, Andijon xalqini xursand qilish bo‘yicha topshiriq berdi.
Shundan so‘ng klub rahbariyati bir qator tajribali murabbiylar bilan muzokaraga kirishdi va yakunda rossiyalik taniqli murabbiy Aleksandr Xomyakov nomzodida to‘xtalishga qaror qildi.
Ishqibozlarga yaxshi ma’lumki, so‘nggi 10 yilni Muborak "Mash’al" jamoasida samarali o‘tkazgan Aleksandr Andreevich mamlakatimiz futbolida o‘ziga yarasha xurmat qozongan mutaxassislardan biridir. Eng avvalo ichki imkoniyatdan foydalanib, mahalliy kadrlarni yetishtirib borishga xarakat qiladigan Xomyakov "Andijon"da ham ushbu falsafasidan foydalanishni rejalashtirgan.
Yangi mavsumga jamoani tayyorlagan Ildar Sakayevning sog‘ligi bilan muammo paydo bo‘lgani uchun, jamoani "Paxtakor", "Navbahor" va "Mash’al" jamoalariga qarshi yordamchi murabbiy Jamshid Saidov olib tushayotgandi. Mana endi bosh murabbiy masalalasi hal bo‘ldi.
Ildar Sakayev o‘z arizagi ko‘ra, egallab turgan lavozimidan ozod etildi. Yangi bosh murabbiy Aleksandr Xomyakovga endilikda Jamshid Saidov, Diyorbek Mirzaboyev va Qobiljon Olimjonovlar yordam berishni davom ettirishadi.
Kecha Muborakda "Mash’al" jamoasiga qarshi Liga Kubogining 1-turidan so‘ng futbolchilarga qisqa muddatli tanaffus berilgandi. Shu bois jamoa a’zolari 6 iyun kuni Andijon shahridagi sport-qarorgohga yig‘ilishadi va yangi bosh murabbiy futbolchilarga rasman tanishtiriladi.
Aleksandr Andreevich esa 4 iyun kuni Andijon shahriga yetib keladi.
