Андижон вилояти ҳокими Шуҳратбек Абдураҳмоновнинг вилоятда миллионлар ўйинига бўлган юксак эътибори, жамоамизни доимий равишда қўллаб-қувватлаши, ҳар бир уй учрашувларимизга шахсан ташриф буюриши табиийки андижонлик минглаб ашаддий мухлисларни қувонтирмоқда. "Андижон" жамоасининг натижасига бефарқ бўлмагани учун ҳам клубимиз президенти - Шуҳратбек Абдураҳмонов бош мураббий масаласини зудлик билан кўриб чиқишни, лозим бўлса хорижлик малакали мутахассисни жал этиш ва бу орқали ижобий натиажаларга эришиб, Андижон халқини хурсанд қилиш бўйича топшириқ берди.
Шундан сўнг клуб раҳбарияти бир қатор тажрибали мураббийлар билан музокарага киришди ва якунда россиялик таниқли мураббий Александр Хомяков номзодида тўхталишга қарор қилди.
Ишқибозларга яхши маълумки, сўнгги 10 йилни Муборак "Машъал" жамоасида самарали ўтказган Александр Андреевич мамлакатимиз футболида ўзига яраша хурмат қозонган мутахассислардан биридир. Энг аввало ички имкониятдан фойдаланиб, маҳаллий кадрларни етиштириб боришга харакат қиладиган Хомяков "Андижон"да ҳам ушбу фалсафасидан фойдаланишни режалаштирган.
Янги мавсумга жамоани тайёрлаган Ильдар Сакаевнинг соғлиги билан муаммо пайдо бўлгани учун, жамоани "Пахтакор", "Навбаҳор" ва "Машъал" жамоаларига қарши ёрдамчи мураббий Жамшид Саидов олиб тушаётганди. Мана энди бош мураббий масалаласи ҳал бўлди.
Ильдар Сакаев ўз аризаги кўра, эгаллаб турган лавозимидан озод этилди. Янги бош мураббий Александр Хомяковга эндиликда Жамшид Саидов, Диёрбек Мирзабоев ва Қобилжон Олимжоновлар ёрдам беришни давом эттиришади.
Кеча Муборакда "Машъал" жамоасига қарши Лига Кубогининг 1-туридан сўнг футболчиларга қисқа муддатли танаффус берилганди. Шу боис жамоа аъзолари 6 июнь куни Андижон шаҳридаги спорт-қароргоҳга йиғилишади ва янги бош мураббий футболчиларга расман таништирилади.
Александр Андреевич эса 4 июнь куни Андижон шаҳрига етиб келади.
