10-19 iyun kunlari Gollandiyaning Xertogenbos shahrida kamondan otish bo‘yicha navbatdagi jahon chempionati bo‘lib o‘tadi.
Mazkur dunyo birinchiligidan avval Xalqaro kamondan otish federasiyasi o‘zining 53-Kongressini o‘tkazmoqda.
Ushbu Kongressda xalqaro federasiya o‘tgan davr mobaynida qilingan ishlar bo‘yicha hisobot olib borib, kamondan otish sportini yanada ommalashtirish, kelajakdagi yirik musobaqalarga mezbon shaharlarni aniqlash masalalarini ham ko‘rib chiqmoqda.
Yig‘ilishda e’lon qilingan qarorga ko‘ra, 2023 yili yili bo‘lib o‘tadigan dunyo birinchiligiga Germaniyaning Berlin shahri mezbonlik qiladigan bo‘ldi. Imkoniyati cheklangan sportchilar o‘rtasidagi dunyo birinchiligini esa Chexiyaning Plzen shahri qabul qiladi.
E’tiborlisi, mazkur yig‘ilishda O‘zbekiston kamondan otish federasiyasi raisi Otabek Imomov ham ishtirok etmoqda. Yurtdoshimiz Kongress doirasida Xalqaro kamondan otish federasiyasi prezidenti Ugur Erdener bilan uchrashib, ushbu sportni yurtimizda yanada rivojlantirish borasida o‘zaro fikr almashishdi.
Yana bir necha kundan so‘ng start oladigan dunyo birinchiligida kelasi yili Tokioda o‘tadigan Olimpiada uchun yo‘llanmalar o‘ynalishi yanada ahamiyatli. Tabiiyki, terma jamoamiz vakillari ham mazkur musobaqada asosiy tarkib bilan ishtirok etishadi.
