Kecha O‘zbekiston milliy terma jamoasi KXDRga qarshi o‘rtoqlik o‘yinida maydonga tushib, 4:0 hisobida g‘alaba qozondi. 

O‘zbekiston futbol assosiasiyasi matbuot xizmati “KXDR ustidan qozonilgan g‘alabada muxlislarning ham hissasi katta” nomli kichik maqola e’lon qildi.

“O‘yin yirik hisobda vakillarimiz foydasiga yakunlandi. Mazkur chiroyli g‘alabada “Milliy” stadionga yig‘ilgan 34 000 nafarga yaqin muxlislarning ham hissasi katta ekanini alohida ta’kidlash kerak.

Ular o‘yin davomida tinmasdan futbolchilarimizni olqishlab turishdi. Stadionda ajoyib atmosfera yaratishdi. Ayniqsa, turli rangdagi bayroqchalarni ko‘tarib o‘ziga xos mozayka yaratilgani, xuddi Yevropa stadionlaridagi kabi chiroyli manzarani yuzaga keltirdi.

Bunday muhit o‘zimizning futbolchilarga dalda bergan bo‘lsa, raqib futbolchilarini dovdiratib qo‘ydi. Bu haqida KXDR terma jamoasi bosh murabbiyi Yun Chon Su ham o‘yindan keyingi matbuot anjumanida aytib o‘tdi.

“O‘yinda stadiondagi muhit bizning futbolchilarga bosim yukladi. Ular o‘z o‘yinlarini namoyish qila olishmadi”, deb ta’kidladi.

Shuningdek, O‘zbekiston milliy terma jamoasi bosh murabbiyi Ektor Kuper ham muxlislarning tashirfini alohida baholadi.

“Bugun stadionda ko‘plab muxlislarni ko‘rib juda ham xursand bo‘ldim. Ochig‘i, o‘rtoqlik o‘yiniga bu qadar ko‘p muxlis keladi, deb kutmagandim. Bizni qo‘llab-quvvatlab turgan muxlislarimizga alohida minnatdorchilik bildirib o‘taman”, dedi Kuper.

Qadrli futbol muxlislari! O‘zbekiston milliy terma jamoasi sizning qo‘llab-quvvatlashingiz ostida yanada yaxshiroq va chiroyliroq o‘yin namoyish qilishga, ijobiy natija qayd etib, yurtimizdagi barcha muxlislarni xursand qilishga intiladi! Shunday ekan, stadionga tashrif buyuring, terma jamoamizni olqishlang va g‘alabaga o‘z hissangizni qo‘shing!

11 iyun kuni soat 18:30da Suriya terma jamoasiga qarshi kechadigan o‘yinda barcha muxlislarni “Milliy” stadionda kutib qolamiz!”, deyiladi O‘FA xabarida.

Eslatib o‘tamiz, kecha KXDRga qarshi o‘ynagan O‘zbekiston terma jamoasi tarkibida gollarga Odil Ahmedov, Temurxo‘ja Abduholiqov, Igor Sergeev va Doston Tursunovlar mualliflik qildi.