Bugun jahon sportining afsonasi, Barselona-1992 Olimpiya o‘yinlari chempioni, Pekin-2008 Olimpiya o‘yinlari kumush medal sovrindori, uch karra jahon chempioni, Yevropa chempioni, Osiyo o‘yinlari g‘olibi, O‘zbekiston Respublikasida xizmat ko‘rsatgan sportchi, “Do‘stlik”, “Mehnat Shuhrati” va “El-yurt hurmati” ordenlarining sohibasi, jahon gimnastikasi tarixida yettita yozgi Oliimpiya o‘yinlarida ishtirok etgan yer yuzidagi yagona sportchi Oksana Chusovitina 44 yoshni qarshi olmoqda.
Oksana Aleksandrovna, Sizning shaxsiy hayot va sportdagi faoliyatingizda yosh avlodga namuna qilib ko‘rsatgudek boy tajriba bor. Siz metin iroda sohibi, haqiqiy sport afsonasi va mehribon onasiz.
Shu yoshingizda ham tinib-tinchimasdan yurtimiz bayrog‘ini baland ko‘tarishdan charchamayapsiz va bunday natijalaringizdan barcha yurtdoshlarimizning quvonchi cheksiz.
Qalbingizda Tokio Olimpiadasida ishtirok etib, uning oltin medalini qo‘lga kiritishdek niyat jo‘sh urmoqda. Sizning mana shunday ezgu maqsadingiz ushalishini, olamshumul g‘alabalaringiz bilan jahon gimnastikasi muxlislari, xalqimiz va Prezidentimizni xushnud etishda davom etingizni tilab qolamiz.
