Yengil atletikaning balandlikka sakrash yo‘nalishi bo‘yicha terma jamoamiz a’zosi Svetlana Radzivil Yevropa arenalaridagi zafarli yurishlarini davom ettirmoqda. Hamyurtimiz bu gal Fransiyanining Monjeron shahrida o‘tkazilgan xalqaro turnirda zafar quchdi.

“Pyer de Kuberten” stadionida kechgan musobaqada sportchimizning qayd etgan natijasi 1.91 metrni tashkil etdi. Musobaqada boshqa bir hamyurtimiz Nadiya Dusanova ham ishtirok etib, 1.89 metr natija qayd etdi va bronza medali bilan taqdirlandi. Dusanova kuni kecha Polshadagi musobaqada g‘olib bo‘lish uchun 1.86 metr kifoya qilgan edi.

Ta’kidlash joiz, Tokio Olimpiadasining normativi ushbu yo‘nalishda 1.96 metrga teng. Ko‘rinib turibdiki, hamyurtlarimiz tobora yuqori sport formasiga kirib borishmoqda. Musobaqada kumush medal estoniyalik Grete Udrasga nasib etdi. Udras ham 1.89 metr ko‘rsatkich qayd etgan. Biroq bu balandlik uchun Dusanovadan kamroq urinish sarflagani uchun ikkinchi pog‘onaga ko‘tarildi.

Tokio Olimpiadasining yo‘llanmasi uchun harakat qilayotgan har ikki sporchtimizga kelgusi musobaqalarda yanada ulkan zafarlar tilab qolamiz.