“Dinamo” stadionida nafaqat Samarqand shahri, balki viloyatimiz tumanlaridan ham keladigan muxlislar sonini yanada oshirish maqsadida may oyidan “Eng faol targ‘ibotchi muxlis” tanlovini boshlagan edik.
Ushbu tanlov shartlariga ko‘ra, ro‘yxatdan o‘tgan muxlislar “Dinamo” stadionidan 3 donadan bepul afishalar olib, o‘z tumanlari markazlarida uchrashuv afishasini ilib, futbolga targ‘ibotni boshladiganlar. Xususan, jonkuyar va fidoiy muxlislar say’-harakati bilan uzoq tuman va shaharlarimiz markazlari, gavjum bozorlari peshtaxtasida “Dinamo” uchrashuvi afishalari ilinmoqda.
“Eng faol targ‘ibotchi muxlis” tanlovi ishtirokchilari bugundan boshlab, «Dinamo» stadioni asosiy kirish qismi oldiga kelib, 28 iyun, juma kuni o‘tadigan “Dinamo” – “Bunyodkor” uchrashuvi afishalarini bepul olib, o‘z tumanlari markazlariga ilishlari mumkin. Sevimli «Dinamo» o‘yinlari afishasini o‘z tumaningiz markaziga ilib, tumandoshlaringizni futbolga chorlab, targ‘ib qiling!
Tanlovdagi barcha ishtirokchi muxlislarning ishlari “Dinamo” matbuot xizmati tomonidan sarhisob qilib borilmoqda. “Eng faol targ‘ibotchi muxlis” tanlovi boshida e’lon qilinganidek, uch nafar eng faol targ‘ibotchi muxlis, g‘olib sifatida 1-davraning so‘nggi uchrashuvi, 28 iyun kungi 13-turdagi “Dinamo” – “Bunyodkor” o‘yinida esdalik sovg‘a bilan taqdirlanadi.
“Dinamo” klubi matbuot xizmati.
