“Динамо” стадионида нафақат Самарқанд шаҳри, балки вилоятимиз туманларидан ҳам келадиган мухлислар сонини янада ошириш мақсадида май ойидан “Энг фаол тарғиботчи мухлис” танловини бошлаган эдик.

Ушбу танлов шартларига кўра, рўйхатдан ўтган мухлислар “Динамо” стадионидан 3 донадан бепул афишалар олиб, ўз туманлари марказларида учрашув афишасини илиб, футболга тарғиботни бошладиганлар. Хусусан, жонкуяр ва фидоий мухлислар сайъ-ҳаракати билан узоқ туман ва шаҳарларимиз марказлари, гавжум бозорлари пештахтасида “Динамо” учрашуви афишалари илинмоқда.

“Энг фаол тарғиботчи мухлис” танлови иштирокчилари бугундан бошлаб, «Динамо» стадиони асосий кириш қисми олдига келиб, 28 июнь, жума куни ўтадиган “Динамо” – “Бунёдкор” учрашуви афишаларини бепул олиб, ўз туманлари марказларига илишлари мумкин. Севимли «Динамо» ўйинлари афишасини ўз туманингиз марказига илиб, тумандошларингизни футболга чорлаб, тарғиб қилинг!

Танловдаги барча иштирокчи мухлисларнинг ишлари “Динамо” матбуот хизмати томонидан сарҳисоб қилиб борилмоқда. “Энг фаол тарғиботчи мухлис” танлови бошида эълон қилинганидек, уч нафар энг фаол тарғиботчи мухлис, ғолиб сифатида 1-давранинг сўнгги учрашуви, 28 июнь кунги 13-турдаги “Динамо” – “Бунёдкор” ўйинида эсдалик совға билан тақдирланади.

“Динамо” клуби матбуот хизмати.