Kecha o‘zbek sportining afsonalaridan biri, Xizmat ko‘rsatgan sport ustasi, basketbolchi Ravilya Nadjipovna Salimova 77 yoshida olamdan o‘tdi.
Ravilya Salimova 1941 yil 8 avgust kuni Surxondaryo viloyatining Sho‘rchi tumanida tavallud topgan. Basketbol bo‘yicha Sobiq Ittifoq terma jamoasi tarkibida 2 karra karra jahon chempioni, 4 karra Yevropa chempionligini qo‘lga kiritgan. Shuningdek, ikki marta Butunjahon Universiada o‘yinlarida oltin medallarga sazovor bo‘lgan.
Klubdagi faoliyati davomida nafaqat Sobiq Ittifoq, balki qator xorijiy jamoalardan taklif bo‘lsa-da, faqat Toshkentning “Mehnat” va SKIF jamoalari sharafini himoya qildi. Professional sportdagi faoliyatini yakunlagach yurtimizdagi ko‘plab bolalar va o‘smirlar sport maktablarida o‘z mahoratini yoshlarga o‘rgatib keldi.
Milliy olimpiya qo‘mitasi, O‘zbekiston Respublikasi Jismoniy tarbiya va sport vazirligi Ravilya Salimovaning yaqinlari, oila-a’zolariga chuqur hamdardlik bildiradi.
