"Paxtakor" bosh murabbiyi Liga Kubogi doirasida "Lokomotiv" bilan o‘yindan keyin matbuot anjumanida qatnashdi.

- Bahs muxlislarga yoqadigan qiziqarli kechdi deb o‘ylayman. Raqib safida yoshlar o‘ynagan bo‘lsa-da, ular xarakterlarini ko‘rsatishga intilishdi. Biz esa ushbu musobaqada chorak finalga chiqishni maqsad qilgandik va bunga erishdik. Har qanday turnirda "Paxtakor" nomidan maydonga tushamiz. Shu sababli biz klub imijini saqlagan holda bor imkoniyatdan foydalanishga urinamiz. Tan olish kerak, yigitlarda sal ishtiyoq yetishmadi. Chunki raqib tarkibini ko‘rgandan keyin baribir boshqacha kayfiyatda o‘ynashdi. Mavsum boshidan beri 24 uchrashuvda maydonga tushdik, terma jamoa a’zolari umuman dam olishmadi. Endi bir hafta mobaynida ular hordiq chiqarishadi. Keyin ikkinchi davraga tayyorgarlikni boshlaymiz.

Tarkibimizda o‘zgarishlar bo‘lishi mumkin. Lekin hozir aniq nimadir deb ayta olmayman. Hamdamov va Abdullayev tez orada maydonga qaytadi, Sidiqovda esa vaziyat jiddiyroq. Komilov va Yaxshiboyevni ham kutib qolamiz. Oldinda bizni mavsumning qizg‘in pallasi kutib turibdi.