Kecha Malayziya poytaxti Kuala Lumpurda joylashgan Osiyo futbol konfederasiyasi bosh qarorgohida Jahon chempionati-2022 hamda Osiyo kubogi-2023 musobaqalari ikkinchi saralash bosqichiga qur’a tashlash marosimi bo‘lib o‘tdi.

Qur’a natijalariga ko‘ra, O‘zbekiston milliy terma jamoasi ikkinchi saralash bosqichining “D” guruhidan o‘rin oldi. Guruhda terma jamoamizga Saudiya Arabistoni, Falastin, Yaman hamda Singapur termalari raqiblik qiladi.

O‘zbekiston milliy terma jamoasi a’zosi Jaloliddin Masharipov O‘FA rasmiy saytiga qur’a haqida o‘z fikrlari bilan o‘rtoqlashdi.

"O‘ylashimcha, yaxshi guruhdan o‘rin oldik. Hozirgi paytda barcha mamlakatlarda futbolni yaxshi o‘ynashyapti, har bir terma jamoada yaxshi darajadagi mahoratli futbolchilar bor. Lekin agar har bir o‘yinga 100 foiz kuch bilan hozirlik ko‘rsak va yaxshi kayfiyatda maydonga tushsak, har qanday raqibni mag‘lub eta olamiz va guruhda 1-o‘rinni egallay olamiz. Menimcha, ushbu guruhdagi eng qiziqarli va shiddatli o‘yinlarni Saudiya Arabistoni terma jamoasiga qarshi o‘tkazsak kerak", — dedi mahoratli yarim himoyachi.