Tailandning Chonburi shahrida indor xokkey bo‘yicha Osiyo kubogi musobaqasi o‘tkazildi. Qit’amizning 10 ta mamlakatidan tashrif buyurgan xokkeychilar orasida terma jamoamiz vakillari ham sovrindor bo‘lishdi.
Garchi guruh bosqichining so‘nggi turi O‘zbekiston erkaklar va ayollar terma jamoasiga omadsiz kelgan bo‘lsa-da, dastlabki o‘yinlardagi g‘alabalari evaziga har ikki jamaomiz ham bronza medali uchun bahs olib borish imkoniyatini saqlab qoldi. E’tiborlisi, ikki toifada ham terma jamoamiz malayziyalik xokkeychilarga qarshi bahs olib bordi.
Ayniqsa, ayollar o‘rtasidagi bellashuv o‘zining qiziqarliligi bilan ajralib turdi. Asosiy vaqtda 1:1 hisobi qayd etilgach, bulitlar seriyasiga murojaat qilindi. O‘ziga xos lotoreyada esa omad sportchilarimiz tomonida bo‘ldi. Afsuski, yigitlar o‘rtasidagi o‘yin 3:6 hisobida Malayziya terma jamoasi foydasiga hal bo‘ldi.
