Klublar hamda terma jamoalar ishtirokidagi uchrashuvlarni yuqori darajada tashkil etishda komissarlarning o‘rni nihoyatda muhim sanaladi.

Shu boisdan FIFA ham, Osiyo futbol konfederasiyasi ham malakali uchrashuv komissarlarini tayyorlash, ularning bilim va ko‘nikmalarini muntazam oshirib borishga harakat qiladi. Ortda qolgan haftada qit’a futbol konfederasiyasi FIFA bilan hamkorlikda komissarlar uchun seminar tashkil etdi.

Dastlab Malayziya poytaxti Kuala Lumpurda FIFA komissarlari uchun maxsus seminar bo‘lib o‘tdi. Unda FIFA bayrog‘i ostida o‘tkaziladigan musobaqalarda ishlaydigan komissarlar uchun bu sohadagi yangiliklar xususida batafsil ma’lumot berildi. Shuningdek, terma jamoalar ishtirokidagi o‘yinlar tashkilotchiligi jarayonida e’tibor qaratiladigan jihatlar batafsil muhokama etildi. Mazkur seminarda o‘zbekistonlik mutaxassislar – Sanjar Rizayev va Olim Arifov ishtirok etishdi.

Bundan tashqari Bahrayn poytaxti Manamada OFK bayrog‘i ostida o‘tkaziladigan uchrashuvlarda faoliyat olib boruvchi komissarlar uchun seminar tashkil etildi. Unda O‘zbekistondan Baxtiyor Mametov, Ramil Ilyasov, Akmal Rahmatov, Ahmed Tillayev va Yuliya Panina ishtirok etishdi. Ishtirokchilar seminar yakunida imtihonlar topshirishdi.