O‘zbekistonda FIFA tasnifidagi jahon chempionatlari va UYEFA Chempionlar ligasi o‘yinlari uchun futbol to‘plari ishlab chiqariladigan zavod ochiladi. Bu haqda mamlakatimizning Pokistondagi elchisi Furqat Sidiqov va Forward Group kompaniyasi egasi Xvaj Ma’sud Axtar o‘rtasida bo‘lib o‘tgan muzokaralarda ma’lum qilingan.

Ta’kidlash joiz, Forward Group sport tovarlari, asosan, futbol to‘plari tayyorlaydi. Ushbu brend 2014 va 2018 yillardagi jahon chempionatlari, qolaversa YECHL uchun rasmiy va yagona to‘p yetkazib beruvchi bo‘lgan. Shuningdek, qo‘l to‘pi, voleybol koptoklari, sport sumkalari ishlab chiqariladigan zavodlarga ega. Ayni chog‘da zamonaviy tibbiy jarrohlik vositalarini ham ishlab chiqaradi.

Tashqi ishlar vazirligi matbuot xizmati xabariga ko‘ra, Forward Group O‘zbekistonning iqtisodiy salohiyatini inobatga olgan holda aynan bizning mamlakatda birinchi investisiyaviy loyihasini amalga oshirishga qaror qilgan. O‘zbekistonda MDH va Yevropada muqobili yo‘q bo‘lgan zamonaviy korxonani tashkil etish uchun 2017-2019 yillarda ulkan ishlar amalga oshirildi. Ushbu zavod Andijonda qad rostlaydi.

Qo‘shma korxonaning ishlab chiqarish salohiyati oyiga 3000 ta to‘pga teng. O‘zbekistonga olib kelingan asbob-uskunalar o‘z yo‘nalishida yagonadir va tijorat siri hamda intellektual mulkning qimmatbaho ob’ektlari hisoblanadi.

Natijada UYEFA, FIFAning jahon miqyosidagi va boshqa nufuzli futbol turnirlari uchun “O‘zbekistonda ishlab chiqarilgan” brendi ostida to‘plar taqdim etiladi.

Ma’lumotlarga qaraganda, pokistonlik biznesmen Andijon viloyatida Forward-TH Sports loyihasi muvaffaqiyatli amalga oshirilsa, kompaniyasi O‘zbekistonda sport sumkalari hamda dunyo futbol klublari uchun liboslar ishlab chiqarish bo‘yicha yirik investisiya loyihalarini hayotga tatbiq etishni rejalashtirayotganini bildirdi.