26 iyul – 1 avgust kunlari Tojikistonda Markaziy Osiyo futbol assosiasiyasi tomonidan o‘tkaziladigan “CAFA U-16 championship-2019” musobaqasi bo‘lib o‘tadi.
Mazkur musobaqada O‘zbekiston, Tojikiston, Eron, Turkmaniston, Afg‘oniston va Qirg‘izistonning o‘smirlar terma jamoalari ishtirok etishadi.
Bugun O‘zbekiston U-16 terma jamoasi ilk o‘yinni soat 20:30da tojikistonlik tengqurlariga qarshi Dushanbedagi “Markaziy stadion”da o‘tkazadi.
Musobaqa oldidan o‘tkazilgan matbuot anjumanida terma jamoamiz ustozi Azamat Abduraimov quyidagicha fikr bildirdi:
- Tojikistonda o‘tadigan CAFA chempionati bizning terma jamoamiz uchun joriy yil hisobidan ilk xalqaro musobaqa bo‘ladi. Yaqindagina tojikistonlik tengqurlarimizga qarshi Xo‘jandda 2 ta o‘rtoqlik o‘yini tashkil etgan edik. Ushbu o‘yinlar biz uchun ancha foydali bo‘lganini ta’kidlay olaman. O‘sha o‘yinlar bilan solishtirganda hozirda tarkibimizda 6-7 ta o‘zgarish mavjud. Markaziy Osiyo futbol assosiasiyasi chempionati yuqori darajada o‘tishiga aminman. Barcha raqiblar munosib darajada. Har bir o‘yinga jiddiy hozirlik olib borishga urinamiz. Birinchi raqibimiz – Tojikiston terma jamoasi bo‘ladi. Uchrashuv qiyin bo‘lishi tayin, lekin biz faqat g‘alaba uchun harakat qilamiz, - dedi mutaxassis.
