Ispaniya chempionatining yangi mavsumi 3 haftadan so‘ng start oladi. Xabaringiz bor, so‘nggi kunlarda La liga va Ispaniya qirollik futbol federasiyasi o‘rtasida mojaro yuzaga kelgan. Tomonlar chempionat taqvimini tuzishda yakdil qarorga kela olishmayapti. Federasiya o‘yinlarni faqat shanba va yakshanba kunlari o‘tkazishni talab qilayotgan bo‘lsa, La liga rahbariyati taqvim tuzishda avvalgidek juma va dushanba kunlariga ham o‘yin qo‘yishni istamoqda.

Mazkur tortishuvlar samarasi o‘laroq "Barselona"ning La liga 1-turidagi o‘yini vaqti o‘zgardi. Bilbaoning "Atletik" klubiga qarshi safardagi o‘yin dastlab 16 avgust, juma kuniga belgilangan edi. Ammo uchrashuv 17 avgust, shanba kuniga ko‘chirildi. Bahs Toshkent vaqti bilan 23:45da boshlanadi.