"Paxtakor"ning xaloskori sifatida murabbiylar tomonidan ta’riflangan Vladimir Chumakov ajoyib shifokor sifatida nom chiqargandi.

Vladimir Chumakov 1932 yil tavallud topgan. U "Paxtakor"da 11 yil faoliyat olib borgandi. O‘z vaqtida Chumakov nayza uloqtirish bo‘yicha besh karra O‘zbekiston chempioniga aylangan va yengil atletika bo‘yicha SSSR sport ustasi unvoniga sazovor bo‘lgan. Uning rekordi 15 yil mobaynida yangilanmay turgan.

Toshkent tibbiyot instituti va O‘zbekiston jismoniy madaniyat va sport institutini tamomlagan Vladimir bo‘sh vaqtida ilmiy izlanishlar bilan mashg‘ul bo‘lardi. "Paxtakor" bilan safarga yo‘l olishidan bir kun avval jismoniy madaniyat va sport ishlari bo‘yicha davlat qo‘mitasiga ikki uslubiy ishlanmani taqdim etadi. Keyinchalik uning vafotidan so‘ng 1980 yilda "Futbolchilarda sport jarohati" va "O‘quvchilarda sport jarohati va uning muolajasi" nomli kitoblari nashr etildi. Uning izlanishlarida jarohatga olib keladigan sabablar, ularni yengib o‘tish haqida batafsil to‘xtalingan. Maydonda va hayotda futbolchilarga tinimsiz yordam bergan, sutkaning har qaysi qismida o‘z ishini bajargan shifokor shu tariqa o‘limidan oldin ham ilm-fan rivojiga o‘z hissasini qo‘shishga ulgurgandi.

Sportchilik faoliyatidan keyin ikki yil Farg‘onaning "Neftchi" jamoasida ishlagach, Chumakov o‘zi xohlagandek "Paxtakor" shifokori sifatida ishlashga taklif qilinadi. Jamoada u barcha futbolchi va murabbiylarning xaloskoriga aylanib bo‘lgandi. Afsuski, mash’um halokat ajoyib shifokor va ilm-fan rivoji uchun xizmat qilayotgan insonning umriga nuqta qo‘ydi.

Vladimir Chumakov o‘limidan keyin "Shuhrat" medaliga loyiq ko‘rilgan.